粤剧界大件事——《粤剧表演艺术大全唱念卷》首发

白话广州

上两个星期粤剧界有件大事——《粤剧表演艺术大全·唱念卷》首发。点解值得推荐？系因为呢本书当中嘅“语音声韵篇”，其中包括广州话声韵同粤剧舞台官话。呢个声韵篇详细介绍咗广州话嘅声调同分韵，而且仲开列出《广州话分韵总表》同《提示单字总表》。

有人话，粤语九声，本身就系音乐，有平有仄，有独特嘅韵部。之前有本词典《广州话分韵词林》，作者系著名粤剧编剧杨子静同潘振邦。据讲，书里边列出嘅广州话韵目就有52个咁多。呢本书嘅编写，就系为咗帮助粤剧编剧搞清楚粤语嘅九声五十二韵。因为粤语每个字都有一定嘅声调，有啲字只能够填喺特定嘅位置上。填错咗，唱起身要么拉长咗拍子，要么就冇晒味道。

广州话韵目嘅名目比较有趣，有帮忙韵、干寒韵、亲人韵、猪鱼韵、垃圾韵等等，佢哋都系按字嘅读音分门别类嘅。而广州话俗语特别中意用入声韵，譬如垃圾韵嘅“立立杂杂”“冬前腊鸭”；八达韵嘅“七七八八”“邋邋遢遢”；执拾韵嘅“阴阴湿湿”“好噏唔噏”等等。

有人可能感叹，广州话太难学。唔使灰心，听多啲粤语歌同粤剧，包你马上可以分清啲同音字词。